عفريت منحوس

لقيت الفانوس مرة ودعكته ........ طلعلى عفريت… شبيك لبيك
قلت أنا للذل باى وودعته ........ وللعفريت هاهريك هاهريك
قالى هأوأو يا إبن الإنسان ........ ده انا عفريت مارد بن جان
ما يهمنى مكان ولا زمان ........ واطلب وأنا عندى البرهان


************ *****
أناعاوز قمح زُرع فى مصر ........ ومرتب يكفى لآخر الشهر
وحكومة متعصرنيش عصر ........ ومسؤولين يبطلوا فشر
وعاوز عيش من غير طوابير ........ وإنفاق حكومى بدون تبذير
وانتخابات من غير تزوير ........ ورئيس سابق أشوفه كتير

************ *****
عاوز فى بيتى شيكارة دقيق ........ وتبرير مقنع لأى حريق
ومجلس شعب بدون تصفيق ........ وفى كأس العالم لينا فريق
وأكلة كباب مشوى على السيخ ........ مع عيالى فى شرم الشيخ
وأشرب فى القسم عصير بطيخ ........ وأخرج سليم بدون تلطيخ
ونفسى الضحكة ترجع تانى ........ ورصيف للمشى أنا وخلاّنى
وجنيه مصرى زى البرانى ........ يشترى حتة لحمة ضانى

************ *****
رد العفريت عليا بغشم ........ وقال يا مصرى ماكنش العشم
بص.. أنا ممكن أشيل الهرم ........ وأسدلك الأوزون اللى اتخرم
وأرجعلك الأكل اللى اتهضم ........ وتمأمأ البقرة كأنها غنم
أبنيلك قصر من العدم ........ وأقولك معنى شرم برم
بس طلباتك طلبات ملحوس ........ عقله خلاص أكله السوس
ده تخطيط يا بنى ومدروس ........ إنك تعيش على طول موكوس
وأحنا بناخد منكوا دروس ........ إزاى يبقى الجن متعوس
ويا ريت ترجعنى تانى الفانوس ........ وأنا راضى أعيش محبوس
بدل ما أخرج واتبهدل زيك ........ ويتلم موكوس على متعوس

بصراحة انا ضحكت وجوايا حسرة والم من اللى احنا فيه بس اللى احنا فيها احنا السبب فيه

لان الرسول صلى الله عليه وسلم عليه افضل الصلاة والسلام قال(ياتى زمان على امتى يحبون خمس وينسون خمس يحبون الدنيا وينسون الاخرة , يحبون المال وينسون الحساب , يحبون المخلوق وينسون الخالق ,يحبون القصور وينسون القبور , يحبون المعصية وينسون التوبة .فان كان الامر كذلك ابتلاهم الله بالغلاء والوباء والموت الفجأة وجور الحكام ) صدق رسول الله صلى الله عليه وسلم

صدق الله العظيم جزاك الله خيرا ذات النطاقين وهو ده اللى بيحصل دلوقتى

بجد تريقة فى محلها وبجد لخصت حالتنا فى كلمتين حسبى الله ونعم الوكيل تسلم ايدك فيروس