قصيدة على اسم مصر لصلاح جاهين

قصيدة على اسم مصر لصلاح جاهين

قصيدة على اسم مصر من القصائد الرائعه لصلاح جاهين وانا دورت عليها في المنتدى ملقتهاش فقلت انزلها ويارب تعجبكم

القصيدة

ا

اسم مصر

على اسم مصر التاريخ يقدر يقول ما شاء

أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

على اسم مصر

مصر النسيم في الليالي وبياعين الفل

ومرايه بهتانة ع القهوة .. أزورها .. واطل

القى النديم طل من مطرح منا طليت

والقاها برواز معلق عندنا في البيت

فيه القمر مصطفى كامل حبيب الكل

المصري باشا بشواربه اللي ما عرفوا الذل

ومصر فوق في الفراندة واسمها جولييت

ولما جيت بعد روميو بربع قرن بكيت

ومسحت دموعي في كمي ومن ساعتها وعيت

على اسم مصر

أنا اللي اسمي حتحـور .. أنا بنت رع

مثـال الأمـومـة ورمـز الحـنـان

تفـيض حـلمـاتي وتمـلا الـتـرع

وتسـقـي البـشـر كلهـم والغـيـطان

نهايته يا مصر اللي كانت أصبحت وخلاص

تمثال بديع وانفه في الطين غاص

وناس من البدو شدوا عليه حبال الخيش

والقرص رع العظيم بقى صاج خبيز للعيش

وساق محارب قديم مبتورة ف أبو قرقاص

ما تعرف اللي بترها سيف والا رصاص

والا الخراب اللي صاب عقل البلد بالطيش

قال ابن خلدون أمم متفسخة تعيش ليش

وحصان صهل صحى جميع الجيش

على اسم مصر

النخل في العالي والنيل ماشي طوالي

معكوسة فيه الصـور .. مقلوبة وانا مالي

يا ولاد أنا ف حالي زي النقش في العواميد

زي الهلال اللي فوق مدنة بنوها عبيد

وزي باقي العبيد باجري على عيالي

باجري وخطوي وئيد من تقل أحمالي

محنيه قامتي .. وهامتي كأن فيها حديد

وعينيا رمل العريش فيها وملح رشيد

لكني بافتحها زي اللي اتولدت من جديد

على اسم مصر

مصر .. التلات أحرف الساكنة اللي شاحنة ضجيج

زوم الهوا وطقش موج البحر لما يهيج

وعجيج حوافر خيول بتجر زغروطة

حزمة نغم صعب داخلة مسامعي مقروطة

في مسامي مضغوطه مع دمي لها تعاريج

ترع وقنوات سقت من جسمي كل نسيج

وجميع خيوط النسيج على نبرة مربوطة

أسمعها مهموسة والا أسمعها مشخوطة

شبكة رادار قلبي جوه ضلوعي مضبوطة

على اسم مصر

وترن من تاني نفس النبرة في وداني

ومؤشر الفرحة يتحرك في وجداني

وأغاني واحشاني باتذكرها ما لهاش عد

فيه شيء حصل أو بيحصل أو حيحصل جد

أو ربما الأمر حالة وجد واخداني

انا اللي ياما الهوى جابني ووداني

وكلام على لساني جاني لابد أقوله لحد

القمح ليه اسمه قمح اليوم وأمس وغد

ومصر يحرم عليها .. والجدال يشتد

على اسم مصر

منقــــــــــــــــول
بس اللى مش منقول هو اللى جاى ايه رايكم فى حد لسه شايف مصر كده ولا لا طب لو لا لا ليه؟
انا لو قلتلكو انا شايف مصر ازاى هاتقولو عليا اسرائيلى بس خلينى اشوف رايكم الاول وبعدين اقول راى
واخر الكلام سلااااااااااااااااااااااااااااااام

_________________
قصيدة على اسم مصر لصلاح جاهين 2m77rsw

اولا بشكرك على فكرة انك تضع قصيدة عن مصر
انيا موضوع احنا شايفينها ازاى دى صعبة اوى
انا عن نفسى بحبها من جوايا بس شايفاها سودة ووحشة طبعا هى كدة علشان اللى فيها
واحيانا كتير الواحد مش بيعرف يستبين مشاعره من ناحيتها

اقولك انا عن نفسى مش عارف ليه عندى احساس انى من كتر كرهى للنظام والحاجات الغلط الى فى البلد والطريقة الغبية اللى بتدار بيها كرهتها مش عارف نفسى اعيش فى اى دولة عربية تانية انا واهلى لحد ماتتعدل شوية وارجع اقول ماهى مش هاتتعدل لو كل واحد عمل كده فمش عارف فبطلت افكر الصراحة وهاحاول اعود نفسى عليها مدى الحياااااااااااااة

_________________
قصيدة على اسم مصر لصلاح جاهين 2m77rsw