قصيدة من ديوان"وطن خرده"الممنوع من الطبع

يعز على

=====

يعز على أكون رحال على مركب !!!

ويفضل شطها واقف ما بيودعش

ولاببسمة

ولابدمعة

ولابتنهيده أو اهه

كأنه عايزنى اروح مارجعش

يعز على اكون نسمةأمل صافيه

مانيش كداب

ويفضل شعرها السايح

كما اللبلاب ما بيهفهفش!!!!

ولا نظرة حنان منها

ولا لمسة ايدين دافيه

ولو تقبل تكون جافيه

أنا مااقبلش

يعز على اكون صورة

ف عز الفرح منسية

ووقت الضيقة منعازة

ووقت الضنك ؟؟؟؟

باكون راجل ولا مليون

واضحى بكل ماأملك

ولا باندمش

يعز على أكون حاسس بمافيها

وادوب ف تراب حوافيها

واطبطب فوق جدايلها

وادلعها واحايلها

تنام هى وانا مابانامش

يعز على أكون ف الفرن

انا نارها

وتحت الآرض حفارها

وأغلى خطاوى مشوارها

وخيرها يرووووح كدا كله

على اللى ما شالش

لا همه تبقى فرحانه

او زعلانه!! متضايقه

ولا عينها تكون رايقه

وخاليه من الدموع والغش

يعز على اكون

خير الولاد فيها

واشيل عنها مايبليها

ووقت الجرح اداويها

ووقت الحرب مغوارها

تقوم وقت السلام تعمل!!!!

بايدها!!!!!!

كام بطل من "قش"

=========

الشاعر مجيب عيد أحمد

عضو رابطة الزجالين وكتاب الاغانى

عضو منتدى المثقف العربى

عضو جمعية مضطهدى أمن الدولة سابقا