بسم الله الرحمن الرحيم
طبعا الواحد لما كان داخل الجامعة اول يوم كان فى دماغة حجات يامااااااا كتير
بتخص الشباب كلهم ولاد و بنات
وعلى فكرة مش كل الى انا كتبة لازم ينطبق على الكل
يلا
على بركة الله نبداء
• أخيرا خلصت الثانوية العامة:
ياااااااااااااااااااااااااااااااااااه أخيرااا خلصت من الثانوية العامة بعد ذل. كانت أيام الله لا يرجعها. بس أنا مش عارف أعمل إيه ؟ الحمد لله التنسيق ظهر وجت لى صيدلة بس أنا مش متخيل خالص إيه اللى هيحصل
• مبنى الكلية ومبنى المدرسة ( الحوش والفصول ) ياترى هنقدر ننط من فوق السور زى أيام العز ؟
يا ترى مبنى الكلية زى مبنى المدرسة ، طيب الكلية فيها فصول ؟ أنا كنت فى ثالثة تانى فصل المتفوقين ياترى هكون فى أولى كام فى الكلية ؟ آه افتكرت دا فيه إعدادى فى الأول . طب هكون فى إعدادى أول واللا تانى ؟ الله أعلم . طيب افرض إن الحصة معجبتنيش – حصة إيه يامتخلف – اسمها محاضره. طيب خلاص لو المحاضره معجبتنيش هقدر أزوغ على الحوش وأنط من فوق السور وأروح ع الكافيتريا اللى جنب المدرسة زى ماكنا بنعمل زمان ؟ واللا سور الكلية عالى ؟ لا يا عم اتهيألى مش هقدر أعمل كده ، بيقولو فيه حرس فى الكليات ولو عملت كده ممكن يفتكرونى حرامى وتبقى فضيحة . زمان فى المدرسة كان كبيرها يقفشنى عم أمين بواب المدرسة وكنت بزبطه بربع جنيه وكانت ماشية عال العال . وبعدين هيا الفصول جنب بعضها واللا خلطابيطا يعنى بما إننا كبرنا بأه المفروض الواحد يدخل الفصل اللى على مزاجه ؟. يوووووووووه دانتا مش هنا خالص هوا مش أبو خليل صاحبنا قال إن الفصل اسمه مدرج والدفعه كلها بتقعد فيه صبيان وبنات مع بعض ؟ أيوه صح هوا قال كده .
• زمايلى
طيب وياترى هلاقى ناس أحبهم ويحبونى زى شلة ثانوى اللى متتعوضش . مين عارف يمكن ربنا يعوضنى بشلة أجمد منها . عموما أنا مش هكون حد غير نفسى ومش هتصنع حاجه وهتعامل مع الكل بطبيعتى وبرجولة وهحاول أقرب من العيال الكويسة يمكن ألاقى شلة عدلة تكون سند ليا نصبر بعض على ما الخمس سنين يعدو على خير وبعد منخلص نكون صحاب وأخوات طول العمر.
• ازاى أتعامل مع زميلاتى ( ياترى هعجبها واللا هتقول عليا عيل ؟)
مشكلة صعبه خالص مش عارف هعمل فيها إيه صبيان وبنات مع بعض ف مكان واحد . هنا بقا يبقى النرجسية هتشتغل على ودنه . يعنى شهامة الدنيا ورجولة الدنيا لازم تبان أدام البنات .. وإلا هيبقى منظرى مش ولا بد وهيقولو عليا عيل .. يعنى استحالة أدى واحد من اصحابى الفرصة يشتغلنى أدام البنات تبقى وقعته سودا وساعتها هتغدى بيه قبل ما يتعشى بيا . أمال ايه دى سمعه يابا . ويبقا يوم مايعلم بيه إلا ربنا لو اتكعبلت ونا ماشى لو بنت ضحكت ممكن أحول من الكلية خالص أمال إيه دحنا صعايدة يابا . ولازم ونا طالع من البيت أزبط هدومى ع الآخر وكله مكوى والجزمة بتلمع وضارب شعرى جيل ومغرق نفسى برفان . من الآخر لازم أبقى واد روش طحن . هيا صحيح الميزانية هتخرم ويمكن الوالد يطردنى برة البيت بش مش مهم الصيت واللا الغنى . أنا عارف إن همه يومين وكل واحد يروح لحاله بس بردو المنظر مهم .
• ازاى أتعامل مع زميلى ( ياترى هيقول عليا عبيطة وهايفة ودماغى فاضية ؟ لازم أخس الأول ؟ وأتكلم برقة؟ إزاى ؟ )
ونا بقا مشكلتى مشكلة . ثانوى كان رحمة عشان مكانش فيه إختلاط يعنى كانت الواحدة تروح المدرسة بشبشب فردة وفردة.. مش مشكلة .. واكلة بصل .. مش مشكلة .. نسيت تغسل وشها ..بردو مش مشكلة.. طيب دلوقتى الكلية دى فيها صبيان وبنات .. ياترى هتكون نظرتهم ليا ازاى ؟ هحاول أكون جد على أد مقدر علشان ميقولوش عليا هايفة ودماغي فاضية .. فكرة كويسة .. بس ممكن لو عملت كده وخدتنى الجلالة يقولو عليا انطوائية ومعقدة .. ياترى إيه الصح ؟ كدا أحسن واللا يقولو عليا روشة ومتفتحه ع الآخر .. لأ عيب برده .. مينفعش.. بس على كل حال .. لازم أزبط نفسى وأعمل برنامج تخسيس من اللى بالى بالك .. يعنى ممكن أخس حوالى 150 كيلو فى أسبوع يادوبك عشان ميقولوش عليا أد الفيل . وأحاول بردو أشفط بطنى ونا موجودة فى الكلية عشان الكرش ميبانش ..أو آخدها من أصيرها وألبس طاقية الإخفا حفاظا على نظافة البيئة .. وطبعا لازم أروح الكلية بتاكس وآجى بتاكس وأحاول أخللى السواق يوصلنى لحد باب المجمع عشان الناس تشوفنى ونا نازلة من التاكس ( أهو برستيج بردو ) وأحاول أخللى الجاعورة متطلعش ونا بتكلم عشان ميقولوش دى دكر متنكر .. رقه بقا .. وأعمل تقويم لسنانى عشان التطريم اللى فيها .. وأركب عدسات زرقا عشان تدارى الحول .. يعنى من الآخر أتنكر تماما وأبقى واحدة تانية غيرى .. تقدرو تقولو غش تجارى .. يعنى نقضيها بالطول واللا بالعرض لحد مالخمس سنين يخلصوا على خير .
• ياترى هطلع بعريس عدل؟
وطبعا اللبس والذى منه مش لله .. يمكن أطلع لى بعريس عدل .. يعنى تبقى شهادة وجوازة .. من باب اختصار الوقت والجهد .. وبعدين أي بنت بتدخل الجامعة النهاردة بتطلع مخطوبة أو مشبوكة أو متجوزة ويمكن تطلع ومعاها عيال .. مش بعيييد .. يامسهل .. وطبعا الصبيان اللى معانا مينفعوش للمشروع ده لأنهم بالطبع شوية عيال لسة قدامهم مشوار طويييييييييل .. تخرّج وجيش وشغل .. دا طبعا إذا لقى فرصة عمل .. واذا لقى .. موت ياحمار على ما يكون شقة ويفرشها .. حلنى بأه .. يعنى الإرتباط بيهم حوار فاشل من الآخر .. لكن مفيش مانع أخوه الكبير ، خاله ، ويمكن أبوه يبقى عريس لقطة .. على الأقل كون نفسه وجاهز من مجاميعه .. ويقدس الحياه الزوجية .. ويمكن الحظ يضرب وطلع بدكتور من الكلية .. محدش عارف .. ابعت يارب
• الطابور وتحية العلم
كنا زمان نصحى بدرى بالعافية عشان نلحق الطابور وكان ياويله اللى يتأخر عن الطابور وتحية العلم كان الأستاذ جمال يديلة طابور ذنب رافع إيديه ووشه للحيطة ويمكن يخليه يعمل شقلباظ – زرع بصل – لمدة حصة كاملة .. مش بقولكم كانت أيام الله لا يرجعها. الحمد لله إن الجامعة مفيهاش لا طابور صباح ولا علم كمان ..
• الفصول والمدرجات والحوش والفسحة :
كانت تالته ثانوى فى مدرستنا 5 فصول كل فصل فيه سبعين طالب كل تخته كان فيها 3 طلاب سمان عشان أجيب كشكولى من الشنطة اللى بين رجليه لازم زميلى اللى على طرف التختة يقع على الأرض عشان كده كنت بقعد دايما جوه . وكان فيه تنافس بين فصول سنة تالته وكانت تالتة أول تغلب فصلنا رغم إن الفصلين كانو فصول متفوقين عشان كده كانت أول ماالفسحة تيجى كنا بننزل فيهم ضرب فى الحوش وفين يوجعك وفى الآخر نجمع عند المدير عشان ناخد الطريحة اللى فيها الشفا – تشخيصها ورم فى القفا وتمزق فى أربطة الجذمة وتهتك فى ألياف الشراب وضمور فى مصروف الأسبوع الجاى . ياخسارة كانت حاجات لذيذة وذكريات حلوة ياترى هشوف أحلى منها . أولا مفبيش فصول .. فيه مدرجات تقعد فيها الدفعه كلها .. يعنى مفيش تنافس بين الفصول .. وبالتالى مفيش خناقات .. إيه الخنقة دى .. ومفيش حوش .. فيه بداله جنينة
الحرم الجامعى والكفتيريا وتحت الشجره ياوهيبةهههههه.. كويس عشان نشم الورد .. ومفيش فسحة .. لو حبيت آخدها لازم أطنش محاضرة أو سكشن .. مش حلوة الحكاية دى .
• الدراسة باللغة الإنجليزية
فيه حاجة مموتانى من الرعب وقلقانى جدااااا .. كان عندنا الإنجليزى مجرد مادة وكنا شاطرين فيها كمان . بس المشكلة دلوقتى إن الدراسة نفسها بالإنجليزى .. يادى الحوسة ياولاد .. يعنى الدكتور هيفضل يرطن بالإنجليزى طول الوقت .. ويمكن يكح بالإنجليزى كمان .. طيب هنفهم إزاى .. ولو فهمنا نجاوب إزاى .. ياوقعة سودة .. إيه الحل ؟.. اللى محيرنى .. ويمكن يصبرنى .. اللى دخلو قبلنا نجحو إزاى فى الظروف المعنكلة دى ؟.. أكيد لها حل .. أبقا أسأل بتوع أولى عملو إيه ؟؟ .. تبقى نكته لو قالولى نجحنا بالغش .. هههههه آخد كورس انجليزى احتياطى .. بس الإنجليزى فى الكلية مصطلحات علمية .. دى وقعه مايعلم بيها إلا ربنا .. ربنا يستر.
• الندالة وخزى العين فى المذاكرة
طيب هوا الواحد هيستندل مع اصحابه فى المذاكرة زى ماكنا بنعمل فى ثانوى .. يعنى لما زمايلى يسألونى ذاكرت واللا لأ أخزى العين وأقولهم دنا ضايع خالص ومعرفش أى حاجة ف أى حاجة . دنا كنت عيان امبارح وماما كان عندها الحصبة أول امبارح وكنت سهران جنبها .. وأول أول جدى خوفو مات .. والشهر اللى قبله جدى خفرع مات .. والحقيقة إنى كنت طاحن نفسى من المذاكرة .. وآخر السنة أجيب الدرجة اللى هيا .. الغريب إن كله كان بيعمل كده .. وكله كان عارف إن كله بيعمل كده .. فعلا شغل عيال .. يمكن نبقى جدعان شوية فى الجامعة ونبطل حركات ثانوى النص كم دى .
• هشتغل إيه لما أخلص ؟
ههههههه .. أكيد هتشتغل دكتور يا بشمهندس هههههههههه زى ملايين الخريجين اللى اتخرجو قبلك وبعدين دى مش بتاعتك .. دى بتاعة ربنا انت عليك دلوقتى تذاكر وبس والرزق سيبه على ربنا واتطمن ومتخافش رزقك مضمون بإذن الله ولكل مجتهد نصيب
ارجوا ان ينال اعجابكم
_________________
لست مغرمة بأن أصبح فتاة تركع عند قدميها قلوب الرجال ...!!
بل أكتفي ان يشعرني رجل واحد اني اعظم فتاة في نظره وسأجعله رجل فوق كل الرجال ...
الإثنين يوليو 19, 2010 6:37 pm
