خمس فوائد لامتحانات
اولا:موسم الامتحانات اعظم فرصه علي الاطلاق للنوم ولا نومة اهل الكهف كده اول لما يبدأ الشهر الي قبل الامتحان تلاقيك بتنام بالعشرين ساعه وتصحي ساعتين علشان ترجع تنام تاني كنوع من التغيير يعني والحجه الجاهزه :امتحانات والواحد بيعوض في النوم علشان يعرف يذاكر.
ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
ثانيا:الامتحانات فرصه هايله لهواة الاكتئاب لممارسة هوايتهم المضله الاكتئاب والاكئاب في نفس الوقت ولو حد سألك مالك؟ متسيبهوش الا وهو متأكد انك ساقط ساقط وان مستقبلك ذهب مع الريح بلا رجعه وانك "مفقود مفقود مفقود ياولدي" ومتقلقش براحتك اوي في العياط لوعايز اللطم مفيش مانع.
ــــــــــــــــــــــــــــــــــــــــــــــــــ ــــــــــــــــــــــــــــــــــــ
ثالثا:لو طبقت القاعده الي فاتت باحترافيه هتلاقي القاعده الثالثه هلت عليك بفوايدها بما انك هتعيش دور المكتئب المخنوق الي مش طايق نفسه ولا حياته ساعتها ممكن تتسرب من البيت كل يوم بالليل بحجة انك مضايق ومحتاج تشم شوية هوا ومحتاج تشم شوية هوا بعيد عن المكتب والكتب والمذاكره بس مش تسوق فيها اصل تتمسك يا معلم مهو مش كل يوم مضايق وعايز تشم هوا او ترجع برضوا للفايده رقم واحد عندك اوبشنز كتير وهيص ياعم براحتك دي امتحاناااااااااات.
ــــــــــــــــــــــــــــــــــــــــــــــــــ ــــــــــــــــــــــــــــــــــــ
رابعا:وانطلاقا من الحجه الثالثه ممكن تستهلك حجة انك مش فاهم حاجه في الماده وعايز تذاكر مع اصحابك وقتها بقي ممكن تعيشوا براحتكم في اي قهوة ولو الامور متظبطتش ابقوا برروا حكايت القهوة دي بان عندكم ماده اسمها علم الاجتماع في ظروف مواتيه للتواصل مع قوي الشعب.
ــــــــــــــــــــــــــــــــــــــــــــــــــ ــــــــــــــــــــــــــــــــــ
خامسا واخيرا:عندك نت؟...حلو اوي ، الامتحانات بتهيأ فرصه ليك عشان تستخدم جمله:بجيب حاجات للماده من عالنت ، اوك ياحبيبي ربنا يوفقك شوفت ياحسن الواد حاله اتصلح ازاي...كل لما تحب تقعد عالنت اديهم الجمله دي بس خلي بالك لازم تكون منطقي ومقنع لان مفيش حد بيقعد ست سبع ساعات عالنت بيجيب في صفحتين من النت ،الاهالي مبقوش طيبين وبيصدقوا الحاجات دي زي زمان للاسف فما تبقاش انت ولامؤاخذه فهمك تقيل يامعلم.
ــــــــــــــــــــــ
الأربعاء فبراير 03, 2010 6:48 pm
